Jürgen Raap
lives and works in Cologne, Germany
„Öl krisste an de Tankstell“
Jrad han ich in Washington dä George Bush jun. anjeroofe. Ich sage, George, biste eijentlich bestusst! Verzäll doch nit so ne Blödsinn, als ob dä Irak met dä paar rostige Rakete, die se do en dä Wüste erömliege han, de halve Menschheit bedroht. Ehr sidd doch nur hinger däm Öl her. Ävver wenn de Öl bruchs, musste an de Tankstell fahre, do krisste dat Öl in praktische 1,5 Liter-Büchse, am besten nimmste jetz em Winter „Mehrbereichsöl“, da kannste och em Frost met fahre, ohne dat dinge Motor avsüff. Ävver do kannst doch nit einfach ding Soldate irjendwohin schicke un denne Lück do em Irak dat Öl fottnemme! Wo simmer dann he! Und do hätts besser ener als Verteidijungsminister jenomme, dä nit „Rumsfeld“ heißt, un dä de janze Daach nur singe „Rums“, „Krach“, „Knall“ un „Bums“ em Kopp hätt, sondern besser ener, dä zom Beispill „Friedensfeld“ heißt un bei däm mer sage künnt: Nomen est omen. Am besten dähste däm Rumsfeld ne Knallforsch koofe, un noch ne Böller un ein Silvesterraket dobei, da hätt dä Mann jet ze knalle un kütt nit op dumme Jedanke. Un wenn dä Rumsfeld dä Hals dann immer noch nit voll kritt, deihste däm noch en Stinkbomb dobei, ävver pass op, dat dä nit us lauter Jux un Dollerei die Stinkbomb bei dir en et Wieße Hus eren schmieß, weil dä meint, do hätts so ne rustikale texanische Humor un fings dat bestemmp jot. Un wenn Ehr dann em Irak alles kapott jebomb hatt, wä bezahlt dann hingerher dä janze Driss, öm dat widder op ze baue? Do un dä Rumsfeld doch nit.
Ich mein, jot, ne, he en Kölle, do hammer ne Bauunternehmer, dä wor fröher ens Karnevalsprinz. Dä künnt ne Auftrag jot jebruuche. Nit em Irak, do sollt Ehr ja nix kapott maache! Ävver dä ehemalige Prinz kann jo bei Dir en Texas ein Tankstell baue. Dann weißte, wo de ding Öl koofe kanns un muss nit immer bis en dä Irak loofe. Do kanns jo bei dä nächste Dreijestirnsproklamation ens noh Kölle kumme, dann triffste dich met däm Bauunternehmer em Jöözenich om Klo un deihs dat met däm usklüngele. Bei uns weed su e Jeschäff emmer em Jöözenich om Klo usjeklüngelt. An dat lokale „Brauchtum“ bei uns, do musste dich dran jewönne. Wenn dat klapp, krisste och dä Sessions-Orden vum Festkomittee. Also, George, üvverläch Dir dat, ich hür jetz op, dat es jo en Fernjesprääch, dat weed mir söns ze düer, also, mach et jot...
© Karl-Josef Bär/Text: Jürgen Raap 2003
Photo von Karl-Josef Bär: Siglinde Kallnbach
Jrad han ich in Washington dä George Bush jun. anjeroofe. Ich sage, George, biste eijentlich bestusst! Verzäll doch nit so ne Blödsinn, als ob dä Irak met dä paar rostige Rakete, die se do en dä Wüste erömliege han, de halve Menschheit bedroht. Ehr sidd doch nur hinger däm Öl her. Ävver wenn de Öl bruchs, musste an de Tankstell fahre, do krisste dat Öl in praktische 1,5 Liter-Büchse, am besten nimmste jetz em Winter „Mehrbereichsöl“, da kannste och em Frost met fahre, ohne dat dinge Motor avsüff. Ävver do kannst doch nit einfach ding Soldate irjendwohin schicke un denne Lück do em Irak dat Öl fottnemme! Wo simmer dann he! Und do hätts besser ener als Verteidijungsminister jenomme, dä nit „Rumsfeld“ heißt, un dä de janze Daach nur singe „Rums“, „Krach“, „Knall“ un „Bums“ em Kopp hätt, sondern besser ener, dä zom Beispill „Friedensfeld“ heißt un bei däm mer sage künnt: Nomen est omen. Am besten dähste däm Rumsfeld ne Knallforsch koofe, un noch ne Böller un ein Silvesterraket dobei, da hätt dä Mann jet ze knalle un kütt nit op dumme Jedanke. Un wenn dä Rumsfeld dä Hals dann immer noch nit voll kritt, deihste däm noch en Stinkbomb dobei, ävver pass op, dat dä nit us lauter Jux un Dollerei die Stinkbomb bei dir en et Wieße Hus eren schmieß, weil dä meint, do hätts so ne rustikale texanische Humor un fings dat bestemmp jot. Un wenn Ehr dann em Irak alles kapott jebomb hatt, wä bezahlt dann hingerher dä janze Driss, öm dat widder op ze baue? Do un dä Rumsfeld doch nit.
Ich mein, jot, ne, he en Kölle, do hammer ne Bauunternehmer, dä wor fröher ens Karnevalsprinz. Dä künnt ne Auftrag jot jebruuche. Nit em Irak, do sollt Ehr ja nix kapott maache! Ävver dä ehemalige Prinz kann jo bei Dir en Texas ein Tankstell baue. Dann weißte, wo de ding Öl koofe kanns un muss nit immer bis en dä Irak loofe. Do kanns jo bei dä nächste Dreijestirnsproklamation ens noh Kölle kumme, dann triffste dich met däm Bauunternehmer em Jöözenich om Klo un deihs dat met däm usklüngele. Bei uns weed su e Jeschäff emmer em Jöözenich om Klo usjeklüngelt. An dat lokale „Brauchtum“ bei uns, do musste dich dran jewönne. Wenn dat klapp, krisste och dä Sessions-Orden vum Festkomittee. Also, George, üvverläch Dir dat, ich hür jetz op, dat es jo en Fernjesprääch, dat weed mir söns ze düer, also, mach et jot...
© Karl-Josef Bär/Text: Jürgen Raap 2003
Photo von Karl-Josef Bär: Siglinde Kallnbach